Flugvirkjafélag Íslands vinnur mál gegn ríkinu

03.06.2013
 Fréttatilkynning frá Flugvirkjafélagi Íslands, 3. júní 2013.

 

 

 

Flugvirkjafélagi Íslands dæmd samningsaðild
vegna flugvirkja hjá Flugmálastjórn

 


Félagsdómur hefur komist að þeirri niðurstöðu að Flugvirkjafélag Íslands fari með samningsaðild fyrir flugvirkja sem starfa hjá Flugmálastjórn við gerð kjarasamnings við fjármálaráðuneytið. Þetta er niðurstaða dóms sem uppkveðinn var sl. fimmtudag.

 

Flugvirkjafélagið höfðaði mál gegn ríkinu til þess að fá kjarasamningsaðild þessa viðurkennda. Hafði stéttarfélagið um árabil krafist þess ítrekað f.h. flugvirkjanna að gerður yrði kjarasamningur við þá, en flugvirkjarnir hafa fram til þessa starfað hjá stofnuninni án kjarasamnings. Flugmálastjórn hafði fallist á þá málaleitan Flugvirkjafélagsins en fjármálaráðuneytið hins vegar ávallt synjað um gerð kjarasamnings.

 

Í niðurstöðu sinni kemst Félagsdómur að þeirri niðurstöðu að Flugvirkjafélagið eigi rétt til samningsaðildar samkvæmt heimild í lögum um kjarasamninga opinberra starfsmanna, enda sé Flugvirkjafélagið fagstéttarfélag flugvirkja á landsvísu og uppfylli að öðru leyti skilyrði fyrir samningsaðild.

 

Í niðurstöðunni voru takmarkanir á fjölda félagsmanna starfandi hjá ríkinu samkvæmt lögunum ekki taldar setja samningsaðild Flugvirkjafélagsins skorður, enda yrði að túlka slíkar takmarkanir þröngt með hliðsjón af stjórnarskrárvörðu félagafrelsi manna, sem einnig væri varið af Mannréttindasáttmála Evrópu. Takmarkanirnar yrði einnig að túlka þröngt með vísan til meginreglu samningaréttarins um samningsfrelsi.

 

Þá féllst dómurinn ekki á þau sjónarmið ríkisins að meint bann við verkfallsrétti eða að flugvirkjarnir hefðu eftirlit með öðrum flugvirkjum stæðu í vegi fyrir samningsaðild Flugvirkjafélagsins.

 

Stjórn FVFÍ.