Til hamingju með daginn félagar FVFÍ

21.01.2015
Í dag 21. janúar eru liðin 68 ár frá formlegri stofnun Flugvirkjafélags Íslands.
Það var þriðjudaginn 7. janúar 1947 sem var boðað til fundar að Hótel Winston á Reykjavíkurflugvelli. Tilefni fundarboðsins var umræða um stofnun félags flugvirkja á Íslandi. Á fundinn mættu rúmlega 20 manns. Fundarstjóri var kosin Jón N. Pálsson og fundarritari Ingólfur Guðmundsson. Í lok fundarins var kosin þriggja manna nefnd til að gera drög að lögum væntanlegs félags og vinna að öðrum undirbúningi stofnunar þess.
Þann 21. janúar 1947 mættu síðan á Hótel Winston 33 menn til að ræða tillögur undirbúningsnefndarinnar og samþykktu síðar félagslög, en fyrir fundinum lágu drög að lögum væntanlegs félags. Þennan dag var Flugvirkjafélag Íslands stofnað.
Í fyrstu stjórn félagsins voru kosnir þeir Jón N. Pálsson, formaður, Dagur Óskarsson, ritari og Sigurður Ingólfsson, gjaldkeri. Þrír varamenn voru einnig kosnir, þeir Ásgeir Magnússon varaformaður, Sigurður Ágústsson vararitari og Sigurður Erlendsson varagjaldkeri. Endurskoðendur félagsins voru kosnir Gunnar Valdimarsson og Sveinbjörn Þórhallsson.
Uppfrá þessum merka degi hefur félagið okkar verið í örum vexti sem sjá má af því að í dag eru 516 félagsmenn skráðir í félagið.
 
Stjórn FVFÍ sendir öllum félagsmönnum hamingjuóskir með daginn og megi vegsemd okkar eflast á komandi árum eins og hún hefur gert allt frá stofnun félagsins.